DAT NYSC BOY WEY BOKO HARAM VANISH FOR NORTH! DEM DON TALK WETIN DEM GO COLLECT ONTOP IM HEAD

Plenty tori and dem say! dem say don dey enter de mata of dat youth copa wey boko haram vanish comot from Maiduguri two weeks ago.

Una be know say de boy wey im name na Ibrahim Amuta, d only boy im mama and papa born, wey be member of Winners Church  and anoda three people wey comot form deir house go preach and dash tins wey gud to people wey dey live around dat chibok area, before bad bad people wey be Boko Haram con catch dem  carry go.

Anyways, one tori na be say Boko Haram don telephone d church people and de boy family, dey tell dem na a whole N100 million na dem go pay before dem fit see dose people dem catch again o.

If you follow wetin dat boy, Ezeanya, wey carry de mata for head put for Twitter dey halla dey call people for help e say e neva hear anytin from Ibrahim family o, say na only church people de family dey follow talk. E say na one of de church member do small aproko tell am say na N200m na Boko Haram say dem must collect ontop de boy head.

Ezeanya con talk say abeg o, before dem go come judge im own put, e say na gud Samaritan e be o! im and dat boy wey dem Kidnapp nor be friend say dem be dey stay for desame place and anytime e go bab head e dey see d boy too for de barber shop.

E con still talk say, de boy wen boko haram vanish so, na strong guy wey get mind wella. E say if you dey where dis boy dey talk ehn! you go bow because dis boy don fight boko haram before o and anytime na d boy dey use hand nack chest say e ready to enter sambisa forest pursue boko haram.

Till now sha, if not be dis Ezeanya wey loud de mata for Twitter, nobody don hear anoda tin again except de dem say dem say wey aproko people dey talk.

 

leave a reply