Nor be as e be for world cup where be say de person wey go carry de golden boot go house, if like say plenty people score dsame number of goal and dem nor know who dem go give, wetin dem dey do be say dem dey give one person base on say how many ball e pass give people wey dem score.
But for premier league own, if people plenty wey score dsame goal, dem dey share de shoe wey dem make with gold.
De first time wey players share de golden boot na for 1997-1998 season and na Chris Sutton, Michael Owen and Dion Dublin na im share dat year own. den again for 1998-99 jimmy Floyd-Hasselbaink, Michael Owen and Dwight Yorke share share de shoe.
so dis time wen Manchester City win anoda cup take be winner for EPL for two time straight, Pierre-emerick Aubameyang, Mohamed Salah and Sadio Mane, na de three of dem go share de shoe.
Na de two two goal wey Aubameyang and Mane score for de last day of match na im make dem fit reach de guy wey winner last year, wey im name na Salah 22 goals. na small comot Sergio Aguero make imsef reach 22 but na 21 e con fit score.
Na Salah na im get de highest number of ball wey im pass give person score– 8- but, but as nor be world cup wey be say if two people get dsame number of goal, dem dey look oda tins give one person, EPL own be say na share dem dey share am.
Dis season sweet for Mohamed Salah bodi wella as e scatter net score 22 goals, pass 8 ball wey dem score, and na 144 minutes for each goal.
Just like as Salah do am, Pierre-emerick Aubameyang bodi for Arsenal team dis season dey always de put fear for oda players bodi because dem know wetin e fit do with e tiny leg. na with dat leg e take scatter net too score 22 goals, pass 5 ball wey dem score, e own na 132 minutes for each goal.
Even dat omo dudu guy Mane, e imsef finish work for Liverpool as e score 22 goals, na only 1 ball wey im pass enter goal and na a whole 150 e take score each goal.
make we nor forget dat bros, Sergio Aguero for Man City wey still try small even doh e nor reach but im manage 21 goals, e pass 8 ball wey dem score and na 119 minutes e use for each goal.
As e come be na say na three people won wear one shoe so, dem talk say de premier league golden boot as dem dey call don enter voice mail o as e be say three people nor fit wear one shoe.