President Mohammadu Buhari don finally land Abuja on Sunday after he dodge enter UK say abeg body nor be fire wood, who run must rest.
Na around 6:33 for evening na d aeroplane touch ground for Nnamdi Azikiwe International Airport, Abuja.
The talk talk man for buhari wey dem dey call Femi Adesina con talk say make people nor mind all those bad belle and smelling mouth people wey don dey carry talk anyhow since presido travel. As dem begin do aproko say oga presido nor fit come back to naija after 10days because na admission im go for hospital.
Adesina con even talk say for inside their mind, dey con just dey form anyhow tori of how five doctors don draw ear tell buhari to stay UK pass ten days’
Adesina con talk say now o, wen Buhari do land naija, say shebi all those people with their dirty mind shame go catch them na, as say breese don blow, fowl yansh don open ontop all those dem say, dem say, wey dem dey talk and write take deceive many people for naija. Adesina say oya make dem kneel down beg Nigerians say abeg o, make una nor vex for d kind heavy fabu we b don tell una concerning our presido.
“just how many days after we celebrate World Press Freedom Day, we nor look face dey talk say this ‘ abeg free me make I talk as I like’ wey we celebrate nor mean say make people just dey open mouth dey talk anyhow as dem like just to form big big lie dey deceive people wey nor no d true tori.
“dis Buhari administration go always respect and continue to allow journalist talk, say con say na their work wey dem dey do be that but make those people wey sabi tell fabu kuku know say even tap wey dey run anyhow get control.
“all those people wey sabi do aproko untop dem say, dem say tori, make dem no now say na dem dey put fire for d mata, so make dem stop to do aproko up and down but make sure say dem hear d correct tin before dem talk or tell people,” na so Adesina don talk.