Bukola Saraki, wey be de senate president for inside naija don shake bodi follow Economic and Financial Crimes Commission (EFCC), say con say den use key lock im houses for Ikoyi con carry de key go.
Saraki, say dis tin wey EFCC take lock im houses so, say na wuruwuru some tin and na ‘trouble dey sleep yanga go wake am sometin.’
Na dem EFCC people go plaster paper for de houses wey dey 15a, 15b and 17 MacDonald Road, Ikoyi, Lagos.
And make u see as trouble dey sweet some people o, Saraki say de house wey EFCC kukuma go lock na even de once wey im don shout tell people say, abeg oo! everi bodi ooo! na me get all dis houses oo.
De Senate President con also talk same dis tin wey EFCC do so, dem be done do some tin like dis before say nor be new tin and for dat time na court come talk say im hand clean for de mata make dem leave am.
Saraki talk for de paper wey de man wey dey tell am wetin to do, wey people dey call Special Adviser on Media and Publicity, Yusuph Olaniyonu, say EFCC dem dey do like say dem nor know wetin dem dey do but na dem sabi pass and e still talk say na wetin witch dey do people for night na in EFCC dey do to am for korokoro daylight.
OYA SEE WETIN SARAKI USE IM HAND WRITE COME GIVE PEOPLE TO READ;
“We don hear and see say de Economic and Financial Crimes Commission (EFCC) don carry paper plaster for some property wey Senate President, Dr. Abubakar Bukola Saraki, get for Ikoyi, as dem talk say dem wan touch light de houses look deir receipt well well.”
“Dis tin wey EFCC don do so don make us really believe say na ‘koni man die, koni man bury am’ ni be de EFCC mata wey dey ontop our head, and dis tin nor rime with wetin our law talk and na tori dem wan use am talk. Why we talk so na because dis houses so wey EFCC plaster their paper put, we done settle de mata before nor be today wey EFCC toughlit de mata of de house. And even de Federal government sef join bodi carry us go Code of Conduct Tribunal on top dsame mata.”
“E con even join say na for Supreme court wey be de court wey get mouth pass for de country na settle de mata las las dat year. De court con even say make Saraki don worry say e hand clean for de mata and so make no bodi disturb im house again.”
E neva too tey for here wey EFCC chop belle full start anoda touchlite for Saraki mata. Dem say dat time wey Saraki be Govinor for Kwara state, from 2003-2011, dem won look how e take even spend all de money wey touch e hand.