De Duke of Sussex, wey im name be Prince Harry don change im mind o! talk say abeg na next tomorrow na I go bring my pikin comot outside make everybody see fine boy wey Meghan don born for me because pikin wey fine like dis dem nor dey hide am at all.
Dis new tori come surprise plenty people because e neva tey for here wey Harry and dat e wife Meghan waka com outside con talk say, abeg o! make una nor vex o! we nor go quick quick carry our pikin wen we wan born comot outside o. Dem say only dem wan play with de pikin for some time before dem show people the face.
Weda dem show im face o or dem nor show im face, plenty people don dey trow way salute from everywhere for de whole world dey celebrate de new omomo wey Meghan just born.
De omomo wey dem born on Monday for dat kin around 5:26 for evening na im be number seven for queue wey fit become King for obodo England.
Inside de word wey dem bring out from de palace, dem say de Queen, the Duke of Edinburgh, the Prince of Wales, the Duchess of Cornwall and de Duke and Duchess of Cambridge, all of dem happy say Meghan don born pikin.
Dem also talk say even Meghan mama wey dey dere wen dem born de pikin na she happy pass sef.
Meghan papa nko? De man wey dem dey call Thomas Markle, say im proud carry shoulder up say im gran pikin na inside British royal family palace dem born am. Say e know say de boy go grow up well with better sense and respect wey e go take serve im people.
Even Prime Minister Theresa May, Labour leader Jeremy Corbyn and Scotland’s First Minister Nicola Sturgeon dey among the first people wey trow way salute give Harry and Meghan on Twitter.
De pastor wey wed Harry and Meghan for church last year may wey im name na Archbishop of Canterbury Justin Welby, con talk say “Make God bless the new family with plenty love, health and happiness.”
Even plenty congratulations still don comot from some celebrities from United States, where dem born Meghan dat year.
Patrick J Adams, who follow act with Meghan inside dat lawyer lawyer film, Suits, write for Twitter: “I just hear say de world just collect anoda weight, wey heavy with 7 pounds and 3 ounces. plenty love to de boy o and to im correct papa and mama.”
de baby so go get America and British passport because say Meghan im mama na Americana.
Meghan and the baby dey fine and dem say de boy dey chop well and neva too dey disturb dem yet.