Dat Musician for naija wey EFCC gbab, wey im original name na Azeez Falasha, but people con dey call am Naira Marley don land inside hot pot of soup o, as EFCC don talk say na 11 tins wey concern abroad ATM card 419 dem don count on top im head wey im go answer for court on Monday.
If True true say dem con check am say de guy do all de tins wey EFCC talk, dat one mean say na seven year na de court fit give am make e go cool bodi for kirikri and dat one na because of wetin our law don talk for inside Section 33 (2) for de Cyber Crimes (Prohibition, Prevention, etc) Act, 2015.
All dis tins wey dem talk say dem believe say dis musician do na tins wey our law talk say make people nor do. and na de Money Laundering (Prohibition) Act and de Cyber Crimes Act na talk am.
Na for Lagos State High Court dem carry de case wey im number na FHC/L/178C/19 go on Wednesday.
Na wetin dem write inside de case be dis;
“say you, Azeez Adeshina Fashola, wey people dey call Naira Marley, and your paddy Raze (wey we neva catch because e run go hide), around dat December 11 for 2018, for inside dis court power, tink am and con arrange una sefs to use dis Access bank ATM card 42658840359191132 wey nor be your own to collect cash and na so you con commit offence wey Section 27(1)(b) of the Cyber Crimes (Prohibition, Prevention etc) Act 2015 talk say make person nor commit and na dis offence get punishment for inside Section 33(2) of the Same Act.
“say you, Azeez Adeshina Fashola, wey people dey call Naira Marley, and your paddy Raze (wey we neva catch because e run go hide), around dat may 10, 2019, for inside dis court power, with mind of 419 collect fake card 4921819410257431 wey de bank give Timea Fedorne Tatar and so you don commit offence wey Section 33(9) of Cyber Crimes (Prohibition, Prevention etc) Act 2015, talk say make people nor commit and na dat same Section 33(9) of Cyber Crimes (Prohibition, Prevention etc) Act 2015 still don talk de kind punishment wey you go chop.”
De internet scatter de day de news come say EFCC don arrest Naira Marley early mon mon on Friday May 10.
Wen dem catch am, tins like Lappy, diferent different ATM Card wey nor be im name dem write inside but na oda people name like Nicole Louise Malyon, and Timea Fedorne Tatar, na im dem see for im hand.
Dis musician don tey wey im be done dey hail all dose guys wey dey do yahoo yahoo ontop internet and even some of im music wey e don release dey follow hail yahoo boys. Nor be only im dem arrest dat day dem arrest am o, dey also arrest im paddis, Zlatan Ibile, wey also be musician, Tiamiu Kayode, Adewunmi Moses and Abubakar Musa, wey be im boys but dos ones don comot form EFCC jail since on Wednesday.