People wey dey work United Nations, UN, dont shake head for de tin wey happen for Burkina Faso on Sunday wey be saY some people enter church con begin kill people anyhow. Dem say dat tin wey happen so, dem nor support am at all.
Na six people and one pastor na im dose bad boys wey carry heavy gun kill for de church as dem dey worship God for inside one village wey dem call Dablo,for de northern region inside de country. de north don dey get problem of fight fight and plenty wahala nor be today.
For wetin dem talk, Guterres come say “make people for Burkina Faso nor fear o, say make dem join body with each oda to take stand well.”
De UN chief con still advice dem say make dem nor allow bad belle people wey dey do dis kind bad bad tins to scatter dia mind to hate each oda wey fit come let dem begin fight each oda.
E come talk say Church na beta place, so de people wey do dis kin bad tin so, dem go soon catch dem.
President for de UN General Assembly, Maria Espinosa, still chuk mouth for inside de mata talk dey vex nor be small for inside twitter on Sunday.
Espinosa say de people wey kill so, dem must catch dem do dem strong tin because ‘we nor fit manage wicked mind’ she say everybody get right to join any church or worship any juju and dat right people must not look am anyhow.
Anoda person wey still talk na de UN Resident Coordinator for inside Burkina Faso, Metsi Makhetha, tweet say she nor support dis “wicked attacks”.
“As dem kill people na so dem put fire burn de church reach ground with oda building and ond small hospital sef burn join” UN na im write dis one for dia website.